Joint-U Netball

星期六是高興的一天，因為hku 終於贏晒所有比賽，睇住佢地嬴波仲高興過自己落場嬴波。感覺上好似比自己打的時候有多點不同的氣氛，好似熱鬧d 咁。
弟弟又打得勁，又有MVP，下次比賽一定要挑戰佢。
Steve 部相機真係正，原來影相都幾好玩，如果我都識d技術就好lu！不過我應該唔會買一部，寧願借人相機玩 :P
幫人影相高興，同人影相又高興，steve 又可以幫我完成到兩個心願，正！
我覺得clive 真係幾有型，但係女仔shooter就真係唔係好靚咋嘛。

談愛情

早好幾天連續都有不同機會談到了這個題目。大部份人都會遇到這個題目，但每個人對這個問題的看法都可以好不同，而且隨著成長很多答案都會有所改變。對我自己來說都一樣，一些一直比較堅信的理念都有點兒改變，所以都唔可以話甚麼甚麼一生不變。不過始終建立家庭都是夢想目標之一，對很多想法都仍然有點堅持。咁不如就講下這幾天的話題先。

前幾天告別師傅，他對我說我要忘記前女友，因為既然她不能與我共患難，在人生低潮一刻最後都離開了我，不要也罷，不可以再找她。他亦說到愛情可以好實際，所以我應該找個太子女，至少唔憂米，仲話介紹幾個我認識。

我認為說話可以咁講，不過感情事唔可以強求，女人在這方面的決定大都是正確的，要尊重，所以我不會怪她，而且應該多謝她。而且傷心過後一段時間，沒有辦法再找回她，直到一天自己唔再唔開心，這一天就會開始發現唔再喜歡她，時間就好快會過去。我非常相信當一個人放棄了一個機會之後，就不太可能再有第二次機會再次選擇，所以不愛我的再愛我的時候我已經不愛她，我放棄了想去再愛的已經不愛我。

其實愛情在某程度上是可以物質化，不過我點都唔認同愛情要和錢拉上任何關係。窮又未至於唔可以發展或者結婚。因為我相信愛呢樣野係講心，成日都係埋一齊的二人都未必好得過一年可能只有兩三次機會見面的一對；一生為生活為對方而一同努力的二人又未必真的會比豪門的一對過得更不快樂幸福。總之有心的話，岩就自然成事，唔岩的話都會變到岩；所以有錢都無用，有錢都未必真係可以開心。我不是追求物質的人，比較喜歡不實際的愛情；除非你不是一位追求愛情同家庭的人啦，這樣錢的確佔一個重要地位。我一直都好喜歡射雕英雄傳，而且亦造了一張郭靖黃蓉的書籤留為紀念。在故事中最靚的黃蓉為了找尋對她好的人扮了乞丐，但愚笨的郭靖真的全心全意對她好，經過患難最後成親生子，一同為保襄陽城而努力！我喜歡這個故事，二人曾經嘗試過分開一斷長時間，音訊全無，不知生死；亦嘗試過因守諾和受長輩的壓力影響選擇假分手，不過內心仍然只想著對方；二人的背景亦大不同，雖則都是武林中人....等等情節感人，二人的經歷和感情都是我所嚮往的。

之後一天和親戚又講到識女仔。因為打波可以男女一齊打，所以我話打波是可以識到女仔，而且之前都係識d打波既女仔做女朋友。以前多數每星期都有一日同女朋友出街，或者一齊和親戚食飯，而家直頭番到屋企得番自己一個佢地成日都驚我唔習慣同埋唔開心，覺得我自己一個會唔掂會好悶會亂諗野。其實以前我都幾喜歡一個人，有唔少野其實自己一個靜靜地去做都幾有feel，有feel 就一定唔會覺得悶先啦；大個d就都會接受熱鬧，不過唔可以太過份，同埋都唔喜歡太多人既環境；再大個d 就無乜所謂，不過有得揀都prefer 少人活動，會自由自在d，輕鬆d；所以有無女朋友唔係大問題，因為而家既重點最緊要其實唔係有定無，是講心。我之前話過人無目標無生存意義先會自殺，所以只要人有目標，目標又一直做唔到就唔會悶。同樣地，女朋友或者妻子都是名義上向對方或者其他人交代的，追人之前只要喜歡，有目標，擁有與否自然自己都會有心去努力為佢而做事去生活架啦，咁就唔會無目標，唔會悶。所以名義上有無唔係重點，心才是重點。當然可以擁有的更為幸福啦。

第三天又同朋友講到感情的話題，再想一想自己的經歷，的確timing 是一個好重要的factor。由於事情已經過去，我唔可以話自己一開始就已經識錯女仔，怪就怪自己就算當時批評的聲音是多的，也太堅持自己不可能的信念。之後說真的總有點後悔，不過事情經已過去，很多事情都不能再來過。也許沒有第一次的經歷，就不會有認識第二個的機會。第二次事情又已經過去，我又唔可以話自己第二次識錯女仔，不過事情過去左，很多事情都不能再來過。簡單來說，過了可以挽留的時間，心裡面喜歡上另一個人就唔會再喜歡佢。就算現在她再找我，也不會再有可能再一起了。將心比心，自己可以唔再喜歡人，換轉身份，你喜歡的自然可以一樣唔俾機會你，最簡單明白不過。

係呢度都值著這個機會向x 同學分享以下的說話，唔好咁愁。
他問：「如果你可以將你的所有來換取和她一起的時間，不分長短，你願意嗎？」
我願意。
他問︰「如果她回來了，並吩咐你去為她做一件事，你會立刻答應嗎？會無條件支持她嗎？」
其實唔只是一件事，多多都答應呢。
他說︰「其實你用你的所有換取到的就是分手前的時間。分手時的一刻，她所拜托的就是希望和你分手並活得更好。」「其實有很多時候，不做不錯並不是一定合適的，尤其是感情。而女人是一種敏感的動物，她的直覺應該是對的。也許你從未曾做錯甚麼大事，也不是你不愛她，但有很多事你也許早已忽略了，沒有努力去處理，而她亦會逐慚對你失去興趣。」
「其實你的意想和你的年齡真的不太相稱，你太著重於未來的生活，雖然有計劃是好的，但你缺乏了給予另一半熱戀的激情。你不是一個好情人。」
「好好生活並祝福她就是最應該做的事。如果你不能忘記她，請待她比以前的更好吧。也許將來你們還會再見，就好好珍惜那點點的時光。」

如果你仲係喜歡那個人，有這種想法可能會好過一點，直到喜歡上另一個人之後就自然不會再煩惱，就不會再想太多了，因為你會有你的新目標，有新動力。

其實喜歡一個人到拍拖到結婚絕對不是必然，因為兩個人最初因為好感而在一起，好難話唔一齊都可以好了解，不過當然唔排除有呢個可能性，但始終都要經過拍拖到結婚才能去更進一步認識對方。現今社會很自由，唔喜歡就可以分手可以離婚。因此好多人都覺得拍拖可以隨便玩玩，結婚先算比較『認真』。不過打死我都唔認同，點都一定要認真，如果唔係就唔好開始啦。不過我可能太認真，太過去想將來就忽略了做情人應有的本份。不過唔係個個人都會有結婚的念頭，有時真係只是為了玩玩，但係又無理由一開始就問定會唔會有結婚打算才拍拖。所以都可以話要講運，無得太早打算。

我記得之前post 過話:
If you love someone, you would like him/her to be happy.
But that's not enough, you must feel happy also to be with him/her.
That's important for you to do for him/her, but it is also important that you could accept and enjoy what he/she does.
Our love is held by both of us together but not alone.

而家睇番覺得仍然不錯，至少兩個人的事，當然要兩個人去配合，只有單方面去做或者去接受都是沒有好結果的。

不過兩個人點知大家好唔好呢？又點樣配合呢？我記得之前話希望一生只有一次拍拖，直到永遠就最好最浪漫。當然這樣不是不可能，不過唔係人人都可以有咁既福氣。日日都咁多事發生，諗咁多以前，不如努力為將來打算一下更值得。而且拍多幾次拖，有多d經驗都可以令自己對將來的女仔更好，所以我都覺得只要全心全意對自己喜歡的人好便足夠。只要有心，對方如果接受就一定會收到，自己大家都會配合，不論誰多誰少，總之就會大家配合，接受同犧牲啦。

之後再講下一腳踏多船的問題。有人會話同時可以喜歡上兩個人，其實我都唔排除有咁既可能，如果係咁要去選擇其實都幾痛苦。我自己就覺得唔難解決，都算叫經歷過，因為如果拍拖拍得好好的又諗第二個人，自己就知道應該係喜歡左第二個人，否則第二個人點可以影響到自己呢，就算唔認可以騙到人都唔會騙到自己的。到了現在因為放棄左d無謂信念，就更加明白自己的想法。

最後就係所謂take action的問題，究竟喜歡一個人應唔應該同佢講呢？
先講下自己以前，其實如果喜歡上一個人又點可以忍得到唔去俾佢知。喜歡就會成日諗住佢，咩都諗，一定要同佢係埋一齊，一定會action。當然有例外，就係除非佢已經有男朋友或者已經結婚，就可能乜都唔做，因為唔太想去破壞人地啦，雖然我同意有時候，愛是有某程度上的自私的。
到左而家就有d唔同，因為我覺得喜歡上一個人，俾佢知都無問題，因為佢唔喜歡你就唔會理你啦，就正如一個我唔喜歡的人對我說喜歡我，我都唔會去理佢，唔會話我又喜歡佢咁架嘛。不過當然如果本身是朋友，有唔少可能會破壞到友誼，所以要小心，如果有男朋友或者已經結婚就更加要小心啦，提過就算，唔可以太過份，亦一樣唔可以去破壞人地。

不過，雖然我認為可以俾對方知，但亦開始明白點解話愛佢唔一定要得到佢。雖然可能有d矛盾又有d難度，不過有時候諗多d，其實都可以做到。因為我都係覺得最重要係講心，首先如果乜都唔諗，淨係諗自己，就算佢喜歡你與否，佢做d乜你都唔會覺得太差，佢係唔係你身邊都係一樣要諗住人架啦，咁係因為你喜歡人，所以你點都會對人好，咁樣同佢喜唔喜歡自己又真係唔太有關係。當然如果佢都喜歡你，可能你會更加喜歡佢，不過就唔應該因為一知道佢唔喜歡你，你就可以即刻都唔喜歡佢啦。

當然好多人都唔會認同，不過最緊要係自己覺得唔會唔開心。
我諗有d人會好似我以前咁諗好多，例如身份，財政，家人，學歷，工作，興趣等等。我都認同兩個人如果背景相差太遠是麻煩d，不過我點都係覺得一樣係講心，有心就可以一齊解決面對任何問題，不是嗎？

最近再番工之後成日都同隔鄰同事傾計，之前無乜傾過計，而家覺得幾好傾。佢都算後生，但係已經結左婚生仔，所以一定有唔少經驗。身為女人的佢話女仔一定係麻煩，尤其是香港女仔，所以好難會有個可以好善解人意的女仔。佢教我一個女仔點樣實際都好，有d野始終有要求，同埋點都要有d浪漫野。要適當地呃呃氹氹，唔係真係一定一心一意就夠，無咁簡單。佢話可能我以前會好ideal諗某一類人我係會好鐘意，但係真係拍拖，又可能同我expect唔一樣，咁所以覺得有3-4次拍拖可能會清楚d。同埋大家都玩夠,個關係可以長久d,唔會咁易再受引誘。如果我覺得有個女仔係好啱，個女仔係我好鐘意呀，咁就一定唔好放過。咁其實都係，所以做唔做都唔知點好，都真係唔易決定。

談港鐵

而家每朝番工都會搭港鐵，今朝又俾我見到d比較自私的人。所以不如又講下搭港鐵呢個問話題。

我記得之前討論過呢個問題，就係話有d人成日都唔行入d 去架車中間，搞到我上唔到車。不過之後我都唔太理會呢樣野，因為都少左趕時間追車的機會，入唔到就等下一架，除非心情好差又勁勁勁趕時間就可能會嬲d，不過勁趕就已經迫左上車~

唔記得左由幾時開始，有免費報紙出現左。有免費野大家都一定唔會執輸，我自己都會攞番份黎睇。咁樣其實好正常，就算搭港鐵睇報紙都好正常，不過有d人好似點都要用盡辨法去睇就真係唔係幾好。有時我會諗佢可能一日只係搭車的時候先有時間睇，咁我如果而家睇少一陣俾個機會人都無所謂，所以人多既時候我就唔睇報紙。

今朝有個女人係車上面打開份報紙係咁睇，重點係通常d 人都會將份報紙對摺咁睇，但佢就係都要打開晒，完全阻住晒d人。佢仲要唔行入d，之後多人上車所以我被迫到去佢份報紙的領土上，但係佢都仲任由報紙掂住我咁繼續睇，我完全感覺到佢份報紙係我背脊上面，咁樣真係唔係咁好loh。不過可能佢又係果d唔睇就無機會睇既人，唯有唔理佢。

除左呢樣，另一方面就係爭先恐後的問題。有時候架車真係迫到無位企，跟住係到站之前有d人就會不斷迫去門邊。其實一定唔會落唔到車，而且架車咁迫，又郁緊，如果可以等到停車先行都得。同埋有時擺明個站實有人落車，例如太子，旺角咁，咁咪不如等一等，唔係一定要第一個落車架嘛。有時候我都要落車，但係後面又不斷推，明明都無位啦，唔通我又要推其他人咩，contact 晒啦。搭車仲緊迫過打波人釘人。不過我都會體諒佢地，因為可能有人好好好好好趕時間一定要飛快落車，又可能有人會驚落唔到車，因為我細個都有試過驚落唔
到車既。

最後一樣就係企車門的人進退兩難的問題。可能大家都有機會試過到站的時候左右都有人要落車，放得左面d人走，企去右面，右面d人受阻又推，有時又推走埋個袋咁。其實一係就放左面d人先，一係就放右面先，咁咪禮讓下loh，唔駛jip jip 聲。雖然可以話我仲乜唔俾右面ｄ人先，但係我揀左定右都無辦法俾兩邊既人一齊出呢。所以有時我都會出去係隔黎門再入番黎。

順便講下另一經歷。有一次係坑口有條友入閘的時候唔妥我，因為我前面個人ｄｏ唔到八達通，咁我就過隔黎個閘，點知佢原來衝緊過黎，比我阻住左佢。佢就即刻diu 我加其他粗口，我feel 到佢想打我。之後就勁啦，我好自然say sorry 咁就諗住大家繼續入閘就算。但佢行我前面一路望番轉頭啤住我，搞到ｄ人都望過黎。之後我行慢ｄ，以為佢走左啦，點知我落扶手電梯之後見到佢竟然無上車，係度等我，見到又啤住晒我。其實我真係以為佢想打，所以就準備定。離開扶手電梯之後我見佢唔過黎，咁我都廢事理佢咪行開啦。點知佢跟住我係月台行，之後上左車，佢又企係離我兩個車門之外啤住我。我行開佢又跟住我，之後我見佢咁我就唔鬼走，又企係度同佢鬥望。最後佢要落車，叫我小心ｄ，我都唔知佢想點。

行山

星期日下午四時至六時踢波後打籃球到十一點，慶幸我仍然有耐力和體力。

星期一約了到西貢行山，一早醒來手腳都酸得不得了。曾經有幾秒鐘猶疑是否應該繼續去睡覺，不過約好了就一定要出席呢。

十點左右出門去搭1A小巴到西貢市中心。買齊食水之後就搭左一架接駁車去西灣亭 - 今次行山的起點。

今次行山多了一個人，除了keeper 和司徒之外，仲有阿堅，一共四個人。行山呢樣咁有益身心的活動真的不錯，人數可以少至自己一個(雖然危險一點)，多又可以多到幾十個都無問題。唔需要有任何工具，有腳有力行就可以了。

今次行山初段比較辛苦，因為不斷上山，加上自己腳未行都已經先見累，所以都唯有頂住上，還好行下行下就唔覺得太累。而且路都是很安全，很易行，不用手腳並用。不過每次行山都令我諗番從前那一次危險經歷。

一開始行的一段路左右兩旁都有我好唔鍾意的蜘蛛，有好多蜘蛛網，好驚會掂到d 蜘蛛網跟住黏住自己。令我想起之前見到大蜘蛛的一段回憶。整日天氣都算唔錯，起馬唔太熱，但又唔會太大風太凍咁，又無話落好大雨，行左一陣淨係著住T-shirt都已經可以，長衫同褸都唔駛著。下次如果再熱d就長褲都唔駛，就可以輕鬆好多。

由於一開始多上山下山，比較難行，花了差不多一半時間都只是行左四分一路程。我地仲以為本書預計的時間錯左，明明覺得5.5 小時行14 km，應該都幾輕鬆啦，而且一向書上面預計的時間比較充裕。以為行唔晒所以唯有不斷加速，還以為可能要預早找其他出路呢。

途中經過沙灘和露營營地和一個水上活動中心，很久都沒有去露營呢！而且仍然好想玩獨木舟loh!不過太少人識得游水lu。之前有朋友話原來唔係好多人同時識得游水同踏單車，諗下諗下都唔錯得晒。因為驚浸死所以學識左游水學識之後就唔擔心自己會浸死，但係就成日都會諗d不切實際的野，例如話成班朋友遇到海難，我會救到邊個同埋我會救邊過先；如果唔小心趺落山又會點。

最後去到水壩，再行多兩小時出北潭涌坐車回家。原來好多人都會搭的士去水壩度，或者行到個度就等的士回程。好少人同我地一樣行出去巴士站，因為出番去原來都係一直沿住車道，無特別又無乜風景好睇。

眼睛

昨天又再次有一斷時間看不到東西，還好很快睡一會又沒事了。很快便能夠做檢查，雖然醫生說檢查也未必能找到問題所在，就算真的找不到，也希望不要突然看不到哩，至少也有點心理準備嘛。

歲月神偷

昨天下午到了德福去看歲月神偷，覺得真的感動，十分喜歡。
由於自己看戲的時候總是喜歡把自己代入戲中的角色，所以我也一邊看一邊代入了戲中哥哥的角色，而且剛巧也是有一個弟弟。

其實從小我就很喜歡聽老人家說他們以前生活的故事，每一次我都非常嚮往老一輩或古時候的生活。
看到戲中幾家庭一同吃晚飯，我就想起現代人已經不像老一輩所說的一樣，鄰居每每會打招呼，守望相助。我覺得如果擁有熟絡的鄰居，應該會幾熱鬧同愉快。

看到父母一生為二子辛勞工作，到最後用盡所有金錢去延續哥哥的生命，真的不忍，父母總是最偉大的。尤其是十號風球摧毀了他們的家，找醫生去醫治不治之症，真的很傷心。

看到父母能共患難，父對母的體貼，覺得很難得，希望我都可以學到多一點，有機會的話做一個好丈夫。

看到哥哥對弟弟的照顧，加上近年家中的情況，更令我盡量去幫助弟弟完成他希望做的事。雖然大家從不主動去做甚麼，但我相信大家都感覺到的。而且我相信他會比我更成功的，大家的希望都在他身上吧，當然我相信我不會像哥哥一樣那樣年輕便離開吧....

看到哥哥的感情事，我覺得因為女的家庭和自己相差的太遠，所以差點要分開真的很可惜。之後加上女的準備離開香港移民到美國，如果給我，我也會這樣做。但會否找她說再見或表達自己的心意，也許要想一想，但找個藉口甚麼也好，一定會努力去等她哩。就算等不到，只要不知道失敗了，就會有目標，仍然有希望，總要信嘛。

看到女的最後真的回來了，真的很好，很有情有義。雖然回來見面也已經是最後一次見面，但我相信就算人不在，情永遠還在。如果我都可以得到一位可付托終生的紅顏就真的不枉此生了。

Volunteer Team

近來心情好了很多，而且人長大了，多左唔同的經驗，思想都少不免會有所改變。

今日就講下其中一個轉變，就係做義工。我相信如果從小已經識得我的朋友們都知道我比較有私心而且偏心，我會可以對我喜歡的人好好，對其他人就可以比較上唔多關心。所以我曾經講過話我點都唔會做義工，有時間我都去幫下自己人啦。

雖然暫時我都還未有去參加義工活動的機會，但我已經準備了去參加公司的義工隊。
上兩星期回到公司的時候，由於在廣播中介紹到義工隊，加上又沒有甚麼工作可做，所以我就瀏覽一下內聯網。
我發現其實想做義工都不一定要有好大犧牲，以前我覺得最浪費的就是時間，覺得雖然幫人是好，但我沒有太多時間去做這些高尚的事。
但是其實只要有心，有時候做一些自己有興趣而又好簡單的事都已經是義工的一種而且仲可以幫到人。
要我付出很多很多去幫助每一個人，坦白說我真的不能這麼偉大；但是透過參加自己都感到有興趣的義工活動去幫助人，我相信我應該可以付出更多。
我看了一些活動，例如帶小朋友或者老人家行山咁，其實行山對我黎講根本就是娛樂的一種，與其有時要自己一個人去行，參加這種活動既可娛樂，又可算是做了好事幫到人做了義工，其實都應該會幾開心。

所以正如工作一樣，有時候都可以從中找到一個樂趣，雖然我都有一已的私心只去挑選自己有興趣的活動。