第一天早上坐的士到機場集合後便出發到北京開始一連八日的行程。
第一次坐國航，上機時見到免費雜誌是S.H.E 做封面的，大大本，所以立刻拿了一本帶回香港，呵呵。在機場和機上研究相機的功能，準備以全力影多一點點照片，畢竟可以旅行並不是容易的嘛。由於是跟團的關係，基本上八日都要六時半早起，亦都是在酒店吃自助餐早餐，午餐晚餐都像香港過節時一圍圍吃晚飯一樣啦，不多說。但是酒店是五星級的，感覺實在是很舒服，很喜歡住酒店，很喜歡酒店的床，哈哈。另外今次成團都係得自己人係香港人，實在很新奇。有印尼來的，加拿大和美國來的，所以有很多說英文的機會，頗有趣。
到達北京的時候大慨是六時左右。晚飯後便到了王府井大街。基本上我也真的不太記得中四到北京的時候，她是怎麼樣子，總之感覺現在是漂亮得多，進步得多了，治安也好多了。我覺得北京和杭州的環境是最好，蘇州則比上海更好。治安也是上海最差。我記得之前到王府井沒有嘗試過任何地道的美食，今次就準備定如果有人陪我，我咩都食，蟲都食下啦。不過最後都只係食左羊肉串及牛肚。其實之前我都唔食牛肚，今次都算是試過一樣新野啦。不過d 野都唔好食既，下次有機會都唔會再食，哈哈。行完王府井就番酒店。
第二天到了故宮，其實自己對歷史唔係太有興趣，叫做當到此一遊咁。不過皇宮雖然大，但係俾我都唔做皇帝。行完故宮就去天安門廣場，天壇。夜晚再去睇功夫，之後去睇鳥巢水立方夜景。
第三天就先到玉器廠，之後去十三陵，再之後去長城。行完長城之後就去德盛門睇貔貅。賣貔貅o個個人勁無禮貌，不過我唔會同d人一般見識，激唔到我，我又唔會理佢。之後去左d 胡同坐人力車，夜晚就夜遊長安大街，再去世貿天階。
第四天就先去同仁堂，如果唔係屋企人同個醫師講我心有問題，真係想睇下佢地係咪咁勁。不過唔蝕底有好有唔好，把完脈除左話心有問題之外，肺又有問題啦，所以夾埋就氣血運行都唔好啦，會影響腦啦，記憶唔好啦，又會好易就累啦。過多d 時間之後驚心會變大有問題啦，同埋腎又唔係咁好啦，結婚之後就仲明顯會更差。雖然佢叫我入房力勸我之後我都唔買藥，佢之後應該都幾嬲走左，個姑娘就叫我唔好咁多運動，如果唔係可能會有問題。所以話呢，俾人講完，信唔信都好都已經聽左，又唔可以話完全當無野啦。咁我唯有珍惜餘下生命啦，喜歡做既就做算啦，哈哈。之後就去鳥巢，今次可以入去參觀。有個人好似要破唔知咩紀錄，要係高空的屋住一個月，每日唔知幾多個鐘要行出黎企係鋼線上面唔知幾多個鐘，我都有影到幾張相。鳥巢同d 球會俱樂部差唔多啦，不過係幾有特色既。水立方就無緣參觀，我覺得水立方都幾靚，不過就快變商場啦。之後就坐地鐵，跟住就試左第一次腳底按摩，算舒服既。之後就去機場搭飛機去杭州lu。係機上同個團友傾計，起飛傾到落機，叫我一定要去美國，如果有機會我都會既，哈哈。因為飛機延誤，成十點幾十一點先去到食晚飯，之後就番酒店。
第五日就去左西湖，再之後試龍井茶，菊花茶咁啦，環境好好，之後就坐車去蘇州。
第六日係蘇州去左一度坐船的地方，唔記得叫咩名lu。杭州當地個導遊似名星同埋講野都正常d，不過就唔係太鐘意蘇州當地個導遊，有d覺得佢因為介紹蘇州女仔講野好聽，最嬌嗲，所以一路講野都係咁，我諗佢應該係扮野，因為佢無意中穿煲，有一下我覺得佢係變番正常咁講野。d團友都幾鐘意，我覺得如果唔係扮係當地女人既特色都ok既，不過娶個咁有特色既姑娘就真係唔係咁合我心意，哈哈。之後去睇蠶絲，睇緊買絲被既時候，個導遊介紹話，遲d都訓埋一齊，一齊買啦。講到呢度又可以講下印尼兩夫妻同我和我阿姨，一開始我以為個男仔係好似我差唔多咁上下後生，係個女人既仔；淨係得我阿姨估佢地係男女朋友...估左五日之後最後由我去問香港導遊先解開疑團，原來佢地係差唔多歲數，真係唔太覺得。不過其實我地都一樣，因為全部團友都以為我地係男女朋友，之後傾開計先開始解開團友的疑團，有團友覺得我仲大d，原來我已經開始大個同老lu。晚上坐車到上海，去黃埔江睇夜景。
第七日就全日係世博。其實我覺得世博唔係好多野睇。唔係好多野睇係因為d館裡面已經唔會再有d 咩高科技啦，唔會似科學館，而係似歷史博物館啦。不過欣賞下d館既外型設計都已經好ok既，何況仲可以入埋中國館。講真最初我無諗過中國館原來真係要睇咁耐，差唔多成兩個鐘，其他館排隊可能兩個鐘，睇就十幾分鐘行一圈睇完。中國館有d咩可以去我fb睇短片同相啦。全日係世博超過十二小時，所以都真係行到幾累，因為以為行完中國館仲有時間買手信，所以午飯時候只係買左少少，所以無既朋友就無辦法喇，唔可以怪我，不過可以話我，哈哈。
第八日就再去黃埔江睇日景，不過就係夜景o個日既對面岸。之後上左去101既94/F，望住成個上海勁似simcity。再之後就搭磁浮列車去機場番香港。我最喜歡印尼團友，所以左佢fb，卡卡～
